روح العطر من مطر آقطر

استعرض الموضوع السابق استعرض الموضوع التالي اذهب الى الأسفل

روح العطر من مطر آقطر

مُساهمة  سعيد في الإثنين 25 يناير - 11:23

ذُوقْ لحلاوة ف الزّجَـل
و حلِّـي لْسانك بْالْعَسَل
وْما حْلو غير كْـلام الله
سُبحانو عَزَّ وجَـــلّ
-
ذِكرُو رْحيق ف وجدانـي
خاثْر ومْعتّـق ف لْسانـي
من الدّوحة قاطْف وجانـي
قْطُوف النّخوة والـمَثَـل
-
الله يرحم رُوح من قـرَّا
و ربَّـى و كْسا وتْعـرَّا
ورْمى جْهالْتـي على برَّا
وقوّْم عْواجي و الـخَلَل
-
ف قلبي ربّْـعْت الكنّـاش
بـهْذوبو كحّلت لرمـاش
وشاركني لغطا ولفــراش
ومارسنا الطقس بْلا خَجَل
-
من صغري وَانا مولـوع
برْباعي قدُّو مربـــوع
خلخلنـي طرّْ ودعدوع
وما هزّاتْنـي رْياح الدَّجَل
-
طوّعْت لقلم و غنِّيــت
و طاوعت الحال ولبِّيـت
دوّنت بوحي وما خـبِّيت
وتقرّبْت للزين بْالْغَــزَل
-
تْجوّقْت ناي من قاع البير
وغازلت الواد ولغديـر
ولاغيت الطير و لـخرير
وشعلْت شـموع الأَمَـل
-
ف كل صوب ونادي شادي
ف العالي ضربْت وْتــادي
تْحمّسْت لْرايْة بْــلادي
و غنِّيت لروح البَطَـــل
-
واسيت حال الـمهمومـا
وغْريب ف عْتوب مشؤوما
قدّست تْراب الأُمومـــا
آمنت بْالسّرمــد والأزل
عبد الغني الراقي
-------------------
الزجل بلهجتنا الحنينة
ملي نقراوه يبكينا
وعند الكتابة يواسينا
بابو مفتوح
لكل مهموم و مجروح
ف كل دقيقة عطرو يفوح
دوا للقلب و الروح


أخي الكريم عبد الغني
آستمتعت، شكرا لك
----------------
أختي ناجية عامر

يسعدني أنك استمعت بالنص
أشكرك على البصمة الزجلية
تحيتي واحترامي
------------------------
الزجل باب الحكمة
وميزان الكلمة
..ما يدخلو غير دهقان فهم سر الحرف وذاق النغمة.
. مشا فالطريق الراقي ..
اشرب من دن الساقي
خمر من رحيق الشيوخ من زمان وباقي .
تربى فحجر لقوال ..
وذاق حر السؤال..
بعد من قيل وقال..
الله والرسول ديما فلبال..
والخاطر ضاوي بنور لحكمة.
عارف آش كاين هنا
واش كايروج تما.
تاجر فلسواق يبيع سر لكلمة
لكل فايق عايق ماشي بكمة...
تهزو دقة الطبل واشكا لهجوج..
ولا الناي تأوه فغمار النغمة..
كلامو فجا وبهوج
لهل لحزان والغمة.
ما يرتاح حتا ينشر السعادة
فقلوب باكية ..فقدت الهمة...


مصطفى كووار
----------------------
أخي العزيز المصطفى كووار
بصمتك الزجلية الجميلة وشاح زين صدر القصيدة
أشكرك على الإمتاع
مودتي الصادقة
avatar
سعيد
Admin

المساهمات : 368
تاريخ التسجيل : 13/11/2008
العمر : 54
الموقع : www.magdoubkom.kalamfikalam.com

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى